Erasmus und was so dazu gehört: Prag oder die Stodt de olle stroft de an tschechischen Nomen hoben ober leider net tschechisch kennen...

Wenn i Prag wia mirs erleb hoben in wianige Worte beschreiben miaset tat i sogen: wunderschian, der schlimmste Sturm (Emma) seit a poor Johr, Bier des sogor der Petra schmeckt und total in italienischer Hond... (koaner sog dass sell guat isch - v.a. net wenn man sich eppes unschaugen will und von a Horde desinteressierter italienischer Oberschialer mit Sunnenbrillen (man bedenke den Sturm) überschrien und ungrempelt werd)...

Wirklich erzählenswert isch ollerdings lei oane Gschichte, de bis an mein Lebensende an meinem Gerechtigkeitssinn nogen werd:

Um glei amol einleitend zu sogen - i hon im Prinzip nix gegen die Tschechen... war a ungerecht weil mein Opa a holber wor (wenn er des heart drahnt er sich im Grob um) und weil mor in Prag bei der Jana übernochten hoben terfen, de a a Tschechin isch und mit ins in Uppsala studiert hot... Ollerdings isch de Ansicht am letzten Tog - genauergsog in die letzten Minuten insres Pragaufentholts schwar ins schwonken kemmen....

Wermor net glott aufn Weg zum Bus noch Wien von die Ticketkontrolleure in der U-Bohn aufgholten. Für die Petra isch sell on sich jo koan Problem, weil sie ohne gültigen Fohrschein nia in so a Gefährt einsteigen tat weil sie sich unscheißt, ober der Niels, der aus Prinzip und sowieso nirgends Tickets kaft hot logisch desmol a koans ghob.... Logisch - um der Show Willen - muas er unfongen in seine Taschen zu kramen und "I schwör, i hons grod no ghob" stammeln.... Wobei i mein Ticket schun längst gezoag hon unds a gepasst hot weil er koan Wort gsog hot...

Schian und guat irgendwenn wern sie misstrauisch weil der Niels hot so gor nix findet und verlongen insre Ausweise... und do fong is Schlamassel un... plötzlich werd mit mir lei mehr tschechisch gredet und i kenn mi hinten und vorne nimmer aus, weil i grod ausnohmsweise gor net in Kopf hon dass i jo an tschechischen Nochnomen hon... und i holt lei "Sorry, I don't understand you, sorry, sorry... " gstottert bis er endlich wieder auf Englisch umscholtet und moant: "Wia, koan Tschechisch? Hosch jo an tschechischen Nomen..." Und i lei: "Jo ober sell isch a is oanzige" Und er: "700 Kronen!" (25€) Und i: "Wieso?"

Hebs enk - mein Ticket wor lei für 5 Stationen gültig ober i bin 6 gfohren... uuuh! Und hon also im Endeffekt genau is gleiche zohlen miasen wia der Niels a, der auf der gonzen Reise net oan onziges Ticket gekaft hot...

Und lei weil i net Tschechisch konn!!!!!!

Guat... Wuat hon i ausglossen und in bleden Grinser von Niels in gonzen Weg noch Wien a verorbeitet - Zeit für die Fotos:

Katka, Nielsi, Jana:

Tschechisch x3 (zumindest vom Nomen her)

Karlsbrücke

Karlsbrücke mit Petpet

Nielsi und Petpet auf der Karlsbrücke

Nielsi nightshot

Wos genau i in mein Gschäft verkaf woas i net, ober noch mir benonnt isches auf olle Fälle

Oanen Tog seimer in a Dorf a bissl außerholb gfohren (und fost nimmer zrugkemmen) und hoben a Kirche ungschaug wo im Inneren olles aus die Knochen von 40000 (oder 80000 - hmm...) Leit gebaut worden isch.... bruuutal unheimlich!